Ishyaka UDPR ryafashe umurongo w’abemera ihindurwa ry’Itegeko Nshinga

Ishyaka Riharanira Ubumwe bw’Abanyarwanda na Demokarasi (UDPR)ryemeje ko rishyigikiye ko itegeko nshinga ryahinduka, Perezida Kagame akongera gutorerwa kuyobora u Rwanda.

Iri shyaka ryavutse mu mwaka wa 1992 mbere ya Jenoside yakorewe Abatutsi, rigizwe ahanini n’urubyiruko ryafashe iki cyemezo kuwa Gatandatu tariki ya 4 Mata 2015 muri kongere ya 7 y’abayoboke baryo.

Perezida mushya w’iri shyaka watorewe kuriyobora muri iyo kongere mu gihe cy’imyaka itatu,Pie Nizeyimana, yavuze ko bashyigikiye demokarasi, harimo ko n’Umukuru w’Igihugu atazitirwa n’umubare wa manda.

Avuga n’itangazamakuru, Nizeyimana yagize ati“Abayoboke bagiye bagaragaza ko bakurikije ibyo Perezida Kagame Paul amaze kubagezaho, bakumva ko yareka gukumirwa n’iriya ngingo ya 101 y’Itegeko Nshinga, ku buryo nkatwe nk’ishyaka UDPR tubona bitishe demokarasi kubona yajyamo natwe tukaba twashyiramo undi tukiyamamaza noneho Abanyarwanda bakaba batora uwo bashaka.”

Yakomeje ashimangira ko UDPR ishyigikiye ubusabe bw’abaturage bakomeje gusaba ko iyo ngingo ihinduka.

Ibyo iri shyaka rishingiraho ryemeza ko Perezida Kagame akwiye gukomeza kuyobora igihugu nyuma y’umwaka wa 2017, harimo ibyagezweho mu iterambere, umutekano , n’imibereho myiza y’abaturage.

Nizeyimana yagize ati“Ibyo twavuze ni byinshi amaze kutugezaho, iyo tubona umutekano dufite muzi ko ari ishingiro rya byose, turebye mu karere turimo dusanga u Rwanda ari igihugu gifite umukeno usesuye; imibereho myiza y’abaturage, bamaze kugira icyizere cyo kubaho bitandukanye na mbere, biruta mu bindi bihugu bya EAC, mu mashuri uburezi kuri bose, abana b’Abanyarwanda bemerewe kwiga ku buntu ntawe uhejwe.”

Rwigema Gonzague wahoze ari Perezida wa UDPR, watorewe kuba Visi Perezida wa kabiri, yagaragaje ko icyifuzo ari ukugendera ku byo abaturage bashaka.

Yagize ati“Bitewe n’amateka igihugu cyacu cyanyuzemo kugeza uyu munsi amashyaka yose mu Rwanda turakorana neza, abayoboke bacu bagiye bagira ibyifuzo cyane nk’ibi bijyanye n’iterambere na Perezida wa Repubulika, dushyigikiye ko Itegeko Nshinga ryahinduka neza ku buryo umubare wa manda wavaho, niyo twafata manda y’imyaka 5 ariko tukaba tuzi ko abaturage benshi babyiyumvamo. N’abaturage bacu bari mu bashyigikiye ko twarihindura.”

Ishyaka UDPR ni rimwe mu agize Ihuriro ry’Imitwe ya Politiki mu Rwanda.